राज्य शासनाचा महत्त्वपूर्ण निर्णय; शेतकऱ्यांचे होणारे नुकसान टळणार, पण पीक विम्याच्या दाव्यावर कोणताही परिणाम नाही.
कापूस खरेदीची हेक्टरी मर्यादा वाढवली
राज्यातील कापूस उत्पादक शेतकऱ्यांसाठी राज्य सरकारने एक महत्त्वपूर्ण निर्णय घेतला आहे, ज्यामुळे त्यांना मोठा दिलासा मिळाला आहे. कापसाची हमीभावानं खरेदी करताना घालण्यात आलेली हेक्टरी उत्पादकता मर्यादा वाढवण्यास शासनाने नुकतीच मंजुरी दिली आहे. यापूर्वी निश्चित करण्यात आलेली उत्पादकता कमी असल्यामुळे, विशेषतः ज्या भागांत नुकसान झाले नाही अशा जास्त उत्पादन असलेल्या शेतकऱ्यांचा कापूस हमीभावानं विकला जात नव्हता, ज्यामुळे त्यांचे मोठे नुकसान होण्याची शक्यता निर्माण झाली होती.
नवीन उत्पादकता मर्यादा किती?
विविध लोकप्रतिनिधींनी केलेल्या मागणीनुसार, पणन मंत्र्यांनी उत्पादकता वाढवण्यास हिरवी झेंडी दिली आहे. जास्त उत्पादन असलेल्या लातूर, वर्धा, गडचिरोलीसारख्या जिल्ह्यांची सरासरी काढून आता नवीन हेक्टरी उत्पादकता २३.६८ क्विंटल प्रति हेक्टर (म्हणजेच २,३६८ किलो प्रति हेक्टर) इतकी निश्चित करण्यात आली आहे. या निर्णयामुळे शेतकऱ्यांना आता पूर्वीपेक्षा जास्त कापूस हमीभावानं विकता येणार आहे आणि त्यांचे होणारे नुकसान टाळण्यास मदत मिळणार आहे.
